![](https://blogger.googleusercontent.com/img/b/R29vZ2xl/AVvXsEjpsdBQes08Eo1z8gLvXQkMqC3gWdDApArjfWKvQI0EYWRsdg5Cho9y3dPj6HT875XZgb4J-6jB1zSCmYxbTtp0M3Lw2k4ve-lWN9H5TqDEyEjrdHauhZghyphenhyphen7TcIOVRM3Htwtwx5w/s320/autognose.jpg)
O manuscrito adxunto corresponde aos sete anos do propietario deste local. Ao igual que ollando fotos da nenez apreciamos trazos familiares que logo o tempo foi modelando, ensanchando, reducindo , deformando ou desviando, do mesmo xeito descubro eu nos eixos, viravoltas, paus, remates e bágoas destas letras improntas de min mesmo. Nestes a penas 35 caracteres manuscritos, con toda a virxindade do terso e doce territorio da nenez, está a definición dun ser humano: o seu nome, a súa patria. Logo as letras ―como as experiencias, visións e camiños da vida― recompóñense, alixéiranse, únense doutra maneira, ata chegaren, mesmo, a ser inintelixibles.
2 comentarios:
Antes abreviaba o primeiro apelido; agora o segundo nome. Interesante, hum, interesante. ;)
Conserva vostede absolutamente todo. Non quero saber que outras cousas pode almacenar.
Si, en efecto, prezado Arume. As configuracións dun mesmo son ben complexas e sometidas a veleidades inexplicables.
Almaceno moito lume e moita auga, moita luz e moita escuridade, moito día e moita noite... como Vde., como todo o mundo.
Apertas.
Publicar un comentario